ဗြိတိန်-မြန်မာ ပူးတွဲ စစ်ရေးလေ့ကျင့်မှု သြဂုတ်လတွင် စမည် 30.7.2013

သမ္မတ ဦးသိန်းစိန်၏ ဗြိတိန် ခရီးစဉ်အတွင်း နှစ်နိုင်ငံ အစိုးရ အရာရှိများ၏ သဘောတူညီချက်များအရ ဗြိတိန်-မြန်မာ တပ်မတော်များ ပူးတွဲ လေ့ကျင့်ရေးကို လာမည့် သြဂုတ်လအတွင်း စတင်မည် ဖြစ်ကြောင်း မြန်မာနိုင်ငံဆိုင်ရာ ဗြိတိန် သံရုံးမှ နိုင်ငံရေးဌာန ဒုတိယ အတွင်းဝန် Mr.Joseph Fisher က The Voice သို့ ပြောကြားသည်။

ဗြိတိန် အစိုးရ၏ အဆိုပါ ပူးပေါင်း ဆောင်ရွက်မှုများသည် မြန်မာ့တပ်မတော် က တာဝန်သိသော၊ တာဝန်ယူနိုင်သော တပ်မတော် ဖြစ်လာစေရန်နှင့် လူ့အခွင့်အရေးကို အပြည့်အဝ အကာအကွယ်ပေးနိုင်ရန်အတွက် ရည်ရွယ်ကြောင်း ၎င်းက ရှင်းပြသည်။

ယင်းသို့ ပူးပေါင်းဆောင်ရွက်ခြင်းမှာ ဗြိတိန်အစိုးရက မြန်မာ့တပ်မတော်ကို အထောက်အပံ့များ ပေးအပ်၍ လူ့အခွင့်အရေး ချိုးဖောက်ခြင်းနှင့် ပြည်တွင်း မငြိမ်မသက်မှုများကို အားပေးအားမြှောက်ပြုလုပ်ခြင်း မဟုတ်ကြောင်း ၎င်းက ဆိုသည်။

ထို့အပြင် ဗြိတိန် အစိုးရသည် ဥရောပ သမဂ္ဂက ပိတ်ပင်ထားသည့်ကြား မှ မြန်မာနိုင်ငံကို အမေရိကန် ဒေါ်လာ ငါးသန်းကျော် တန်ဖိုးရှိ လက်နက် တင်သွင်းခွင့် လိုင်စင် ပေးအပ်ခဲ့သည့်အပေါ် ဝေဖန်မှုများ ရှိနေကြောင်း၊ ဗြိတိန် အစိုးရက ပေးအပ်သော အဆိုပါ လိုင်စင်တွင် လက်နက်ခဲယမ်း တင်သွင်း ရောင်းချခွင့် တစ်စုံတစ်ရာ မပါဝင်ကြောင်း ၎င်းက ရှင်းပြသည်။

“ဥရောပသမဂ္ဂ အဖွဲ့ဝင်နိုင်ငံဖြစ်တဲ့ ကျွန်တော်တို့အနေနဲ့ သူတို့ ချမှတ်ထားတဲ့ ဥပဒေကို ဘယ်တော့မှ မချိုးဖောက်ပါဘူး” ဟု ၎င်းက ဆိုသည်။

ယင်းလိုင်စင် ရှစ်မျိုးအနက် ခုနစ်မျိုးမှာ အရပ်သားသုံး လေယာဉ် ထိန်းချုပ် သည့် ဆော့ဖ်ဝဲများနှင့် ကမ်းလွန်ပင်လယ် ရေနံနှင့် သဘာဝဓာတ်ငွေ့ လုပ်ငန်းများအတွက် အသုံးပြုနိုင်သည့် ပစ္စည်းများ ဖြစ်ကြောင်း၊ ကျန်တစ်မျိုး သာ မြေမြှုပ်မိုင်းကို ရှင်းလင်း ဖော်ထုတ်သည့် စစ်သုံးပစ္စည်း ဖြစ်ကြောင်း ၎င်းက ဆိုသည်။

နိုင်ငံတော်သမ္မတ ဦးသိန်းစိန် ဗြိတိန်နိုင်ငံသို့ ဇူလိုင်လ ၁၅ ရက်နေ့ တွင် ရောက်ရှိခဲ့စဉ်က ဗြိတိန်နိုင်ငံ ဝန်ကြီးချုပ် ဒေးဗစ် ကင်မရွန် ဗြိတိန် ကာကွယ်ရေး ဝန်ကြီး Philip Hammond တို့နှင့် တွေ့ဆုံရာတွင် ဒီမိုကရေစီစနစ် ဖော်ဆောင်ရေး၌ အပြည့်အဝ တာဝန်ယူနိုင်သော တပ်မတော် ဖြစ်လာစေရန်အတွက် ဗြိတိန် တပ်မတော်က မြန်မာ့ တပ်မတော်နှင့် စစ်ရေးအရ ပူးပေါင်း ဆောင်ရွက်မှုများ၊ စစ်ရေး လေ့ကျင့်ပေး မှုများ ပြုလုပ်ပေးသွားမည်ဖြစ်ကြောင်း ကမ်းလှမ်း ပြောကြားခဲ့သည်။

သမ္မတ၏ ခရီးစဉ်အပြီး တစ်ရက်အကြာတွင် ဗြိတိန် အစိုးရသည် ဥရောပ သမဂ္ဂက ပိတ်ပင်ထားသည့် ကြားမှ မြန်မာနိုင်ငံကို အမေရိကန် ဒေါ်လာ ငါးသန်း တန်ဖိုးရှိ လက်နက် တင်သွင်းခွင့် လိုင်စင် ရှစ်ခုကို ပေးအပ် ခဲ့ကြောင်း ထုတ်ပြန် ကြေညာခဲ့သည်။

အဆိုပါ ထုတ်ပြန် ကြေညာချက်နှင့် ပတ်သက်၍ ဥရောပသမဂ္ဂ က မြန်မာနိုင်ငံအပေါ် ချမှတ်ထားသော လက်နက် တင်သွင်းခွင့် ပိတ်ပင်မှု ကို လေးစား လိုက်နာခြင်း ရှိ၊ မရှိ ဆိုသည်မှာ အဖွဲ့ဝင်နိုင်ငံ အစိုးရ အာဏာပိုင်များ၏ တာဝန်သိမှုနှင့် တာဝန်ယူမှုအပေါ်တွင် များစွာ မူတည်နေကြောင်း ဥရောပသမဂ္ဂ ပြည်ပရေးရာဌာန ဒုတိယ ဥက္ကဋ္ဌ Ms.Catherine Ashton၏ ပြောရေးဆိုခွင့်ရှိသူက The Voice သို့ ပြောကြား သည်။

အဆိုပါ စစ်ရေး လေ့ကျင့်မှုကို မည်သည့်နိုင်ငံတွင် ကျင်းပသွားမည်၊ မည်သို့ ကျင်းပမည် ဆိုသည်ကိုမူ အသေးစိတ် မသိရှိရသေးသော်လည်း နှစ်နိုင်ငံ ကြည်း၊ ရေ၊ လေတပ်များ ပူးတွဲ စစ်ရေး လေ့ကျင့်မည် ဖြစ်ကြောင်း Mr.Joseph Fisher ထံမှ သိရသည်။

ဥရောပသမဂ္ဂသည် လူ့အခွင့်အရေး ချိုးဖောက်မှုများနှင့် တိုင်းရင်းသား လူနည်းစုများကို ဖိနှိပ်မှုများ ကြောင့်ဟု ဆိုကာ မြန်မာနိုင်ငံအပေါ် ၁၉၉၆ ခုနှစ်မှ စတင်တာ လက်နက် ရောင်းဝယ်ခွင့်ကို ပိတ်ပင်ခဲ့ခြင်း ဖြစ်သည်။

The Voice Weekly